مربعات (1) عاشق صلاة النبي

عاشق صلاة النبى أحمد

غصبن عن الخواجات

مسلم وبالله انا موحد

فى الارض والسموات

==========

2

مشيت فى درب الحياه

كان نفسى اتفسح

ما نابنى غير مُعاناه

ورجوعى وانا مكسح

==========

3

ياحلوة سهمك رمانى

والرميه جت فى التمام

صابت فوادى وكيانى

وبقيت شهيد الغرام

===========

4

اوعى تلوم الزمن

وتقول عليه قاسى

من آمن لغير مؤتمن

كتير ياما يقاسى

==========

5

لو ضحك ليك الزمـــان

حـاذر الاعيبه الســـود

 السبع لما عيه وبان هزلان

!رقصت على ضهره القرود

=========

6

الندل دايما قلبل الحيلة

عايش فى الوجود مدفون

انضف من وسخته النيلة

منعوت فى كل مكان بالدون

==========

7

احسن لك تموت من الجوع

 ولاتمد للندل ايدك

ليفتخر عليك فى النجوع

بفضله انه سيدك

==========

8

لو خطبك يوم السفيه

واتطاول عليك بكلامه

اسكت ولا تجاريه

لتتوسم بوسامه

==========

9

حاذر  عديمة الربايا
وان حامت وراك الف ليلة
ما ربط شمشون فى الرحايا
الا خضوعه لدليلة

==========

10

الكلمة كالسهم طاير

تخرج ولاترجعشِ تانى

ياجامع بين الضراير

اخرس ولا تقولش يانى

=========

11

ياقلب بطل نواح

وانسى اللى باعك بلاش

الندل جه او راح

خسيس ولا يسواش

==========

12

فى دولة غرامك عبيد

المسلمين سوى والنصارى

من  طابا لاخر الصعيد

فى حبك يامصر سكارى

===========

13

لو هبت رياح السموم

ميل لها ولا تخاطر

لكل ظالم يوم

وعلى الله جبر الخواطر

========

14

ايوب لما ابتلى بالضر

قال ياارحم الراحمين

وقارون لما بماله اغتر

انخسف أسفل السافلين

=========

15

رياح الفتن لو شدت

تجيب عاليها واطيها

ما تخلى ظهور شدت

ولا رؤوس واطيها

=========

16

كــــــــلب العمده ميكدبشى

فى المجالس بالصدق قايل

وان مـــات العمده متبكهشى

ولاحــتى الكلاب والسحايل

============

17

حقد الحمار على قرد رقص

وسط السـباع ...قال اشارك

قــــــــــام قلده ..رفص

قلب المتاع والحقد آس المهالك

=========
18

الجرح لو كان من الغريب
بيهون العلاج والدوى
اما اللى جراحه القريب
ما يطيب ولوحتى انكوى
===

مربعات حسين الشاعر

اقرا المزيد

موال....جميل وفى الصبايا مليح

ه ياليلى ياليل موالى موال.
===============
جميل وفى الصبايا مليح.
.يحب المرح ويعشق التفاريح
دمه عسل وفى البلاغة فصيح..
تقعد معاه تنسى الهموم والنكد
لكن حذارى من طرف عينه
لو سهمه صابك تطلع فى نظرة الروح
=====================
حسين الشاعر

اقرا المزيد

صديق العمر

فى عز عز الضيق*سافر اعز صديق
وفات لى ا حلامنا
ايه يازمان خلخالك**خلاك تمرجحنا
ترفعنا فوق محملك**والاخر تطوحنا
احنا وايامنا
صاحب وف الدنيادى**ماشفت زيه شبيه
معجون بتبر بلادى**فى كل شده الاقيه
اصيل ومتاصل م الود متفصل والعفة متحصل
شعرة فى دهر ايديه
ايه يازمان خلخالك**خلاك تمرجحنا
مشينا طريق العمر مالروضه للجامعه
فكرين الحياه ها تمر من غير ولا دمعة
اتاريها لبسه اقنعة **ع التفهة تتبسم
دنيا ومتلمعة**وبكيفها بتقسم
ياهموم يامتربعة**سيبينى اتنسم
واعرف جرى له ايه
ايه يازمان خلخالك**خلاك تمرجحنا
كان دايما يعز عليه**يشوفنى متالم
يقول ياصحبى فى ايه**صارحنى اتكلم
طول عمره كان انسان**فى الشده والاحزان
اصبح كانه ما كان
يانفسى ابكى عليه
ايه يا زمان خلخالك**خلاك تمرجحنا

شعر

حسين الشاعر

اقرا المزيد